| Sabtu, September 09, 2006 |
| PIETER ELBERVELD 1 |
Pieter Elberveld (Satoe kedjadian jang betoel di Betawi)
Ditjeritakan Kombali ole sinjo Cyclers
S aratoes taon lebi telah berlaloe, sedari kota Betawi didirikan oleh Jan Pieterszoon Coen jang gaga-perkasa. Soeda lebi dari saratoes taon poela radja-radja Jacatra dan Banten dibikin linjap pengaroenja oleh itoe pendekar Olanda, jang doea kali memerenta Hindia Olanda Timoer (1618-1623 dan 1627-1629). Di tempat, di mana ada berhamboeran toempoekan poeing dari kota Jacatra jang dibinasaken, soeda seratoes taoen lebi berdiri Batavia, "Ratoe dari Timoer". Toch keamanan di itoe masa masi djaoe dari pada bisa dibilang telah dapet ditetapken. Tijada brentinja radja-radja di poeloe Djawa berdaja-oepaja aken tjoba bikin djato kekoeasaannja bangsa Olanda dengen bikin permoefakatan sama laen-laen bangsa Europa. Maksoed-maksoed aken singkirkan orang Olanda dari Betawi ada terkandoeng di sana-sini. Keadaan kota Betawi poen semangkin gawat rasanja. Perampokan dan pemboenoean memboeat njali soldadoe-soldadoe Olanda djadi tjioet. Sebab itoe, banjak orang tijada brani kloewar roema malem-malem. Meski begitoe, kendati Betawi senantiasa ada di dalem bahaja, ini kota tela madjoe dan bertamba madjoe: semingkin tegoe dan djadi lebi bagoes.
Dari betawilah orang Olanda keloewarken prentah-prentahnja ka negri-negri djadjahannja jang djaoe, seperti ka Benggala (Hindi), Molukken (Maloekoe), dan Celebes. Samoewa barang-barang rempa-rempa jang didapet daripada pembesar-pembesar Govenoor General Hindia-Olanda dikirim ka Betawi. Sementara itoe, pemerenta Hindia Olanda memboewat saboewah pratoeran jang misti dipatoehin sama masjarakat Betawi. Iaitoe setla poekoel sembilan malem tijada bole orang kloewar roema. Djika melanggar, soldadoe Olanda tijada segan oentoek menembak pake bedil. Djaman itoe, penerangan masi blom banjak. Karena itoe, tijap orang jang maoe kloewar malem misti make obor sambil oendjoekin dia poenja identiti. Djika tida tjepet njiapin identiti, itoe bedil soldadoe Olanda soeda siap bikin petja pala.
Di waktoe sore dari tanggal 28 December 1721, hari Minggoe, dari pintoe kota Nieuwport tela kaloewar saorang lalaki Djawa, teroes njebrang di djembatan Jassenburg, liwat gredja Portugees, menoedjoe ka Jacatra. Lakoenja itoe orang amat boeroe-boeroe seperti dia orang sedang dioeber orang atawa ia hendak beresken satoe perkara penting. Di itoe siang ada toeroen oedjan besar dan angn riboet di Betawi, hingga di kota ada banja roema jang roesak dan poehoen jang roeboeh, samentara bebrapa praoe di pesisir tela tenggelam atawa binasa, tapi tatkala itoe orang Djawa kloewar dari pintoe kota, oedjan dan angin riboet tela brenti.
Dari Gouvenoor Generaal sampe orang partikeliir jang paling renda di itoe hari moesti binasa!
Orang Djawa itoe ada saorang moeda, oemoernja koerang lebi 30 taon. Badannja tijada besar dan sedikit koeroes, tapi sikepnja ada gaga. Dari matjemnja orang bisa doega, ia ada saorang berpangkat dan bole djadi ada toeroenan bangsawan. Djidatnja ada lebar. Ia poenja mata ada djeli, tapi poenja sorot tjoerang, hingga orang jang memandang padanja lekas dapet perasaan, ini orang tabeatnja ada koerang baek dan dengan sepasang matanja itoe ia tijada nanti dapet orang poenja simpati. Idoengnja besar dan pesek, giginja jang item tijada keliatan, kerna moeloetnja tertoetoep rapet, tapi bibirnja di sebla atas ada berdjendol, sebab di dalem itoe ada satoe batang tembako jang besar.
Ia berdandan rapi, ia poenja sapoe tangan kapala dari kaen batik jang mahal rapi sekali iketannja. Badjoenja ada doewa rangkep: di sebla dalem ada kaen poeti, jang dikantjing rapet dengan sembilan kantjing bermata briliant, sedang di sebla loewar ada dari kaen tjita jang aloes pake leher dan di leher ini ada tiga kantjing mas berikoet limabelas kantjing mas teroes ke bawah. Ia pake tjelana khas djawa disoelam dengan benang mas, tjelana pendek saliwat dengkoel. Tjelana ini dipinggangnja diiket dengan satoe saboek jang dililit sampe lima kali. Di loear itoe tjelana ada satoe kaen pantjang aken menoetoep tjelana itoe, dan ini kaen ditjintjing oleh itoe orang djawa wektoe dia djalan.
Dia orang tida djalan saorang diri, tapi diikoet oleh bebrapa orang djawa laen jang majoengin dia diblakangnja. Pakeannja poen tida semahal orang Djawa iang pertama. Kentaralah bahoewa orang djawa laennja adalah tjoema djadi djongos itoe orang Djawa jang pertama. Dari saboewah pengkolan, tida djaoeh dari geredja Portugees jang besar dan keliatannja angker, itoe orang-orang brenti di depan roema nomer tiga dan itoe orang djawa jang pertama moelai ngetok pintoenja itoe roema, sedang pengikoet-pengikoetnja djongkok menoenggoe, tijada djaoeh daripadanja.
Tempo ketokannja tida berasil, itoe orang djawa mengetok lebi keras. Tiada lama lagi kedengaran ada orang djalan di dalem itoe roema dan segra joega itoe pintoe diboeka oleh satoe boedak prempoewan toea.
"Semita!" kata itoe orang Djawa, "Kowe lama sekali memboeka pintoe. Apa Toewan Goesti ada di roema?"
"Saia diprenta tiada bole kasi orang masoek, Raden," menjaoet itoe boedak toea, "Tapi boewat Raden tentoe bole. Toean ada di kebon belakang dan Raden masoeklah sadja ketemoe padanja."
Itoe raden berdjalan masoek ditoeroet oleh pengikoet-pengikoetnja. Itoe boedak toewa sigra toetoep dan kontji kembali itoe pintoe.
Dengan tjepet itoe Raden dan pengikoet-pengikoetnja djalan di gang pandjang dan lega dari itoe roema. Itoe gang tiada meneroes pada satoe roewangan. Hanja di oedjoengnja ada satoe tangga, jang pegangannja kiri-kanan dioekir oleh toekang-toekang oekir jang pande. Inilah ada tangga aken bisa naek ke loteng di blakang. Di satoe samping dari ini tangga ada satoe pintoe pake katja, dan inilah ada troesan boewat djalan ka blakang, ka dapoer, ka kamar boedak-boedak, ka keboen dan ka kandang koeda.
Itoe Raden dan pengikoet-pengikoetnja boeka itoe pintoe katja dan djalan ka blakang. Disatoe tempat di dalem kebon itoe Raden dapet liat, toean roema sedang djalan mondar-mandir zonder kerdja satoe apa lakonnja ada sedang keras berpikir. Poen roepanja toewan itoe sedang tida senang hati. Itoe toean roema ada saorang toea, ramboetnja soeda oebanan dan giginja ompong. Matjemnja ada saorang Djawa, koelitnja poen tijada sebagai orang Europa. Di itoe kebon jang loewas, tijada ada orang selaennja itoe toean roema jang lagi djalan mondar-mandir deket medja dan bangkoe.
Poen sedari masoek di roema itoe, selaennja itoe boedak toewa, itoe Raden tetamoe tijada ketemoe laen orang. Di dalem gang ia telah ketemoe sadja satoe boedak prempoewan moeda, jang telah kedipin dan tjoebit sembari liwat, tapi ini boedak prempoewan tijada apa-apa reeactie padanja. Ini boedak prempoewan moeda diem-diem telah koentit itoe Raden, laloe semboeni di kebon dan pasang koeping. Mendengar ada orang dateng, toean roema menengo ka kiri-kanan.
Raden tetamoe menghamperkan toean-toean separo toendoek, sedang pengikoet-pengikoetnja ampit mengesot lekas menjingkir ke satoe podjok kebon di tempat jang djaoe, menoenggoe toewannja dan tiada brani dateng deket pada toean roema.
Dengan hormat sekali Raden angsoerkan oedjoeng djari dari doea tangannja jang dirangkep djadi satoe, disamboet oleh toean roema satjara begitoe djoega, kamoedian masing-masing naekkan rangkepan tangannja ka djidatnja, sebagaimana biasa adat orang Slam. Ampir bebarengan dengan itoe dengan soeara renda dan perlahan Raden berkata:
"Salam alaikoem, toean Goesti."
"Alaikoem salam," menjaoet Pieter Elberveld djoega setjara perlahan. "Apa kabar Cartadria?
"Tijada banjak toewan Goesti," kata itoe tetamoe. "Saia tjoema maoe kasi kabar, samoewa soeda tersedia dan lengkap, begimana kita orang bitjaraken."
"Baek, Raden Cartadria. Biar kita nanti dapet sampeken kita orang poenja maksoed. Apa soeratkoe kepada Soeltan Banten soeda dikirim?"
"Soeda, toean Goesti. Wangsa Soeta kemaren doeloe soeda brangkat dengan berdjandji pasti nanti balik kombali dalem tempo tiga hari, soepaja ia djoega bisa toeroet ambil bagian dalem penjerangan kita."
"Soekoerla! Tapi Raden, begimanakah pikiranmoe, apakah kowe pikir maksoed kita orang nanti broentoeng?"
"Tentoe sekali, toean Goesti! Kekoeatan kitaorang ada sampe tjoekoep. Persediaan ada sampe lengkap. Saja sendirih, Madja Praga, Laijga, dan Angsa Tirsta soeda koempoel 17.000 orang, jang semoea tela trima toean Goesti poenja oewang-pembrian. Semoewa orang-orang ini tela dilengkapken dengan sendjata dan di hari penjerangan, satoe malem di moeka, iaorang nanti ada di masing-masing tempatnja. Toean Goesti soeda taoe, bagemana alpa itoe orang-orang Kapir, kaloe iaorang sedang raiaken hari taoen baroe. Di malem penoetoep taoen lama biasanja ia orang plesir poewas-poewasan dan minoem sampe mabok-mabokan. Maka dalem itoe keadaan iaorang tijada nanti sanggoep tjega kitaorang reboet pintoe kota dan pintoe benteng di wektoe fadjar. Semoewa alamartesia soeda disiarken pada kitaorang poenja laskar, semoea soeda diatoer rapi, hingga penjerang dari bebrapa djoeroesan bisa dilakoekan dengan bebareng. Satoe orang tijada bakal terlepas dari oedjoeng sendjata kita. Sabar sadja lagi sedikit hari, toean Goesti, dan lagi tiga hari kowe nanti bisa liat, kitaorang poenja maksoed dapet disampeken dengan sempoerna. Lagi tiga hari semoewa orang nanti berloetoet dihadepan kakimoe, masing-masing mengakoe taloek dan djadi toewan Goesti ampoenja rahajat. Pertjaialah, toean Goesti, semoewa nanti beres!"
Raden Cartadria berkata-kata sambil saben-saben menjemba dan mentjioem kakinja toewan Goesti, tapi saben-saben toean Goesti telah moendoer sedikit, tanda ia blon soeka trima itoe hormat jang besar.
"Ja, Raden," Menjaoet toean Goesti, "Tapi apakah kowe soeda kasi prenta dengan teges, soepaia tijada satoe orang koelit poetih bole dikasi ampoen? Lelaki, prempowan, toea, moeda, dan anak-anak sama sekali moesti diboenoe mati! Dari Gouvenoor Generaal sampe orang partikeliir jang paling renda di itoe hari moesti binasa! Djangan pake lagi kesian! Iaorang pantes sekali diboenoe! Saja pesen bagimoe, Cartadria, djangan hatimoe djadi lemas, kalo denger tangisnja prempoewan sama anak-anak! Ketjil–besar, smoewa mesti ditebas batang lehernja!"
Pieter Elberveld melandjoetkan, "Djika kita slamet sampekan maksoed kita, baroelah kita kirim soerat pada Soesoehoenan dan laen-laen radja di Djawa, dan saja pastiken, iaorang semoewa, djoega orang-orang Tjina dan Makasar, aken bersatoe hati sama kitaorang aken rame-rame binasaken seantero orang Olanda. Keradjaan Jacatra jang tela direboet oleh andjing-andjing Olanda nanti berdiri kombali! Dan dengan radja baroe! Saja, Pieter Elberveld, jang iaorang soeda hinaken, saja, Pieter Elberveld, jang dikataken ada anaknja saorang Duitsch jang aniaja orang Djawa, jang dikataken ada anaknja satoe prempoewan Djawa, jang ditjela toeroenannja di hadepan orang banjak, dimaki-maki oleh soedagar Van der Schuur, tjoema sebab saja tiada maoe merendahken diri padanja, saja, jang iaorang tiada soedi beriken pangkat, saja, jang hartawan besar, hingga separoh dari poelaoe Djawa sadja mampoe beli, saja nanti djadi radja dari Jacatra jang baroe. Persetan sama itoe orang-orang koelit poeti!"
Pieter Elberveld sempat berantem sesama orang Europa, iaitoe Toean Van der Schuur. Di hadepan banja orang, Van der Schuur perna bilang djikalaw Pieter Elberveld adalah djelek poenja moeka, tijada pantes sebagai orang Duitsch, ditamba lagi anak haram dari saorang prempoewan Djawa.
Atas perlakoewan itoe, Pieter Elberveld boekan main bentjinja samah Van der Schuur. Dia djandji bakal bales perboewatan Van der Schouur. Sedjak itoe poela, dia djadi males djika misti bersoewa samah orang sebangsanja. Dia djadi lebi soeka deketin orang-orang Betawi serta ngikoetin adat istiadat mereka. Dia poen disoenat dan memeloek Slam.
Hari soeda mangkin malem. Soeda masoek waktoenja menggerib. Soeda wektoenja sembajang. Pieter Elberveld, Raden Cartadria dan pengikoetnja sigra noedjoe satoe kamar di roema Pieter Elberveld boeat sembajang bareng hadji Abas.
Blon lama Pieter Elberveld, Cartadria dan pengikoetnja masoep ke dalem kamar sembahjang, tatkala dari blakang satoe poehoen besar nongol satoe boedak prempoewan moeda jang eilok sekali. Ini prempoewan moeda ada njata sedang amat ketakoetan: moekanja poetjat, klakoenja bingoeng, sedang matanja koetjoerkan aer mata.
Stela menengok dengan ketakoetan ka kiri-kanan dan tijada dapet liat orang, ia oeroet dada sendiri sambil seraja berkata:
"Allah! Allah! Apa nanti djadi, djika kaloe itoe maksoed kesampean!"
Boedak itoe mengeloes napas pandjang dan setela berdiam sekoetika lamanja, ia berkata lagi:
"Ah, mengapa djoega ajah.. toeankoe mengharep begitoe besar!.. maoe boeat perkara begitoe ngeri, sedang dia soeda toea!.."
Tiba-tiba itoe boedak prempoewan moendoer dengan kaget bebrapa tindak, seperti orang takoet dipagoet oelar di hadepannja sekonjong-konjong ada berdiri satoe lalaki moeda, satoe boedak djoega dari Pieter Elberveld, seorang lelaki jang tjakep, dan baroe beroesia kira-kira doeapoeloe taoen.
Matanja ini boedak lalaki ada bertjilalatan dan dengan soeara gemeter ia menanja:
"Sarina, apa kaoe denger?"
"Apa, Alie?" kata sarina jang melaga bodo. "Saja tida denger apa-apa."
"Itoelah tida betoel," berkata poela Ali, "sebab saja taoe, kowe poen toeroet pasang koeping aken dengarken itoe pertjakepan antara Raden dan toewan kitaorang."
"Saja tida denger apa-apa, Alie!"
"Djanganlah kaoe tjoba berdoesta, Sarina. Djoega saja telah toeroet denger maksoed jang ngeri dari kita poenja toean. Saja djoega ada toeroet semboeni di blakang itoe tembok. Ha! Ia harep, lagi tiga hari ia nanti soeda bisa djadi Toean besar dan boeat itoe ia tiada segen toempaken darah dari banjak orang, jang tiada berdosa satoe apa. Ia rasa, Nabi Moehammad nanti tiada pandang ini sebagai satoe kedosahan besar!"
"Alie!" kata Sarina, "kaoe ada seorang baek dan omonganmoe poen patoet. Tapi.."
"Tapi apa, Sarina" menanja Alie. "Saja ada tjinta padamoe, harep siang dan malem, kaoe nanti bisa djadi istrikoe. Tapi apa ia kata? Ia tolak permintaankoe memperistri kaoe dengan ketoes! Dan ia kata, kaoe tiada nanti djadi istrinja satoe boedak, apalagi satoe boedak sebagai saia!.. Saia meratap, saia menangis, saia tjioem kakinja, minta ia poenja kesian, tapi ia boekan djadi kesian, malah ia tendang dan sepak padakoe! Ini parboewatan jang saia nanti tiada bisa loepa seoemoer idoep!.."
"Diam! Diam, Sarina!" kata poela Ali jang liat, Sarina maoe menjaoet. "Astaga! Saja taoe apa sebabnja, maka toean tiada soeka beriken kaoe padakoe. Ia sendiri maoe pada kaoe! Ia ati-ati, itoe orang kedjem! Ia nanti rasaken pembalesannja satoe boedak!.."
Sarina djadi bertamba kaget, mendengar itoe antjeman boeat toeannja. Ia menoleh ka kiri-kanan, depan-belakang, hingga Alie djoega djadi terkedjoet, toeroet memenengo ka sana-sini. Tapi di itoe kebon tiada ada satoe orang, selaennja ia berdoewa.
Sasoenggoenja djoega bagi Sarina ada serba sala, serba soesa. Ia tijada bitjara doesta: Ia tjinta pada si Alie. Tapi doeloean boedak toea Semita, jang perna boekaken pintoe pada Cartadria, perna kasi bisikan padanja, ia ada anaknja.. Pieter Elberveld. Djadi dia poenja toewan ada djoega ia poenja ajah. Iapoenja iboe ada satoe boedak, si Setoembar, inilah ia taoe, tapi ajahnja, belom perna orang, djoega iboenja sendiri, ada seboet siapa adanja.
(bersamboeng)
|
ditoelis samah cyclers tatkala 9/09/2006 10:21:00 PM  |
|
|
|
Harmoni Junction poenja kawasan...
Passer Senen...
Djalan Djenderal Soedirman taoen 1980an...
Glodok, Tjibeng poenja kawasan...
Monoemen National 1969
Pantjoran Sembilan blas Toedjoepoeloehan
